Të dukesh disa vite më i ri se mosha reale mund të lidhet me rezultate më të mira në disa tregues shëndetësorë. Studiuesit analizuan afro 2.700 persona dhe gjetën lidhje me perceptimin, kockat, mushkëritë, shikimin dhe dëgjimin

Të dukesh më i ri se mosha reale mund të mos jetë vetëm çështje pamjeje. Një studim i kryer nga studiues holandezë sugjeron se njerëzit që perceptohen si më të rinj mund të kenë edhe tregues më të mirë të shëndetit fizik dhe mendor.

Studiuesit analizuan fotografitë e rreth 2.700 personave të moshës 50 deri në 90 vjeç dhe u kërkuan vlerësuesve të pavarur të përcaktonin se sa vjeç dukeshin ata vetëm nga fytyra.

Më pas, rezultatet u krahasuan me të dhënat mjekësore të pjesëmarrësve.

Sipas studimit, personat që dukeshin rreth pesë vjet më të rinj se mosha e tyre reale kishin rezultate më të mira në testet e perceptimit dhe shfaqnin më pak gjasa për disa probleme shëndetësore të lidhura me plakjen.

Në veçanti, ata kishin rreth 15% më pak gjasa të vuanin nga sëmundja pulmonare obstruktive kronike, 24% më pak gjasa për osteoporozë, 16% më pak gjasa të kishin nevojë për ndërhyrje kirurgjikale për katarakt dhe 24% më pak gjasa të kishin probleme me dëgjimin.

Drejtuesi i studimit, profesori Tamar Nijsten, dermatolog në Qendrën Mjekësore Erasmus në Roterdam, shpjegoi se pamja e jashtme mund të pasqyrojë në një farë mase edhe proceset e plakjes brenda organizmit.

Sipas tij, një pamje më rinore lidhej me tregues më të ulët të plakjes në disa sisteme të trupit.

Në studim morën pjesë 2.679 persona me moshë mesatare 66 vjeç. Secilit iu dha një “pikëzim” bazuar në diferencën mes moshës reale dhe asaj që perceptohej nga fotografitë.

Sa më i madh të ishte ndryshimi në favor të një pamjeje më të re, aq më të mira rezultonin disa prej treguesve shëndetësorë.

Studiuesit vunë re gjithashtu se personat që dukeshin më të rinj ishin më shpesh burra, jo duhanpirës dhe në disa raste me peshë pak më të lartë, çka mund të ndikonte që fytyra të dukej më e plotë dhe më rinore.

Megjithatë, autorët theksojnë se studimi tregon një lidhje statistikore dhe jo domosdoshmërisht se të dukesh më i ri është shkaku i një shëndeti më të mirë.

Rezultatet sugjerojnë se pamja e përgjithshme e një personi mund të jetë një nga shumë treguesit që mjekët marrin në konsideratë gjatë vlerësimit të gjendjes së përgjithshme shëndetësore. /noa.al