STAMBOLL – Një hartë gati 5-shekullore brenda një Bible të vitit 1599 ka ringjallur debatin mbi vendndodhjen e vërtetë të Kopshtit të Edenit, parajsës ku sipas traditës biblike jetuan Adami dhe Eva.

Sipas “New York Post”, gjetja vjen nga një Bibël e Gjenevës e vitit 1599, e cila përfshin një hartë të detajuar të titulluar “Situata e Kopshtit të Edenit”. Harta bazohet në një vizatim të krijuar në vitin 1554 nga reformatori protestant John Calvin.

“Është tepër i detajuar duke pasur parasysh epokën në të cilën është shtypur”, tha një koleksionist librash fetarë antikë i njohur në YouTube si Ashleys_AntiqueBibles, duke prezantuar kopjen e rrallë.

Sipas hartës, Kopshti i Edenit ndodhej pranë burimit të lumit Eufrat, në rrëzë të malit Ararat, në Turqinë e sotme. Ky përshkrim lidhet me librin e Zanafillës, sipas të cilit një lumë fillonte në Eden dhe ndahej në katër degë: Pishoni, Gihoni, Tigri dhe Eufrati. Ndërsa dy të fundit janë lehtësisht të identifikueshëm në Mesopotami, identiteti i dy të parëve mbetet çështje mosmarrëveshjeje.

Gjon Kalvini argumentoi se referenca biblike për “burimet” e lumenjve mund t’i referohej edhe grykëderdhjeve ose rrjedhave të tyre të poshtme, duke sugjeruar se Pishoni dhe Gihoni mund të jenë referenca të pjesëve të Tigrit dhe Eufratit. Kjo pikëpamje e vendos Edenit në rajonin e gjerë të Mesopotamisë, të njohur si “djepi i qytetërimit”.

Megjithatë, siç vëren ish-historiania e Universitetit të Uiskonsinit, Justine Angelique Walden, harta e Kalvinit nuk përshkruan perimetrin e saktë të Edenit, por vetëm zonën e përgjithshme. Krahas kësaj, gjeologjia moderne vëren se Eufrati i sotëm u formua nga bashkimi i dy lumenjve me një rrjedhë të ndryshme miliona vjet më parë, duke lënë sërish të hapur misterin historik dhe teologjik.