STAMBOLL – Inxhinieri i dytë me origjinë shqiptare, Erkan Nika, rezulton i zhdukur pas një sulmi ndaj anijes tregtare turke “Aroyat” në ujerat e Detit të Zi pranë portit rus të Novorossiysk.

Anija me 16 anëtarë ekuipazhi pësoi dëme të mëdha dhe zjarr në pjesën e pasme pas një sulmi të dyshuar me dron. Ndërsa shumica e ekuipazhit u evakuua, emri i inxhinierit shqiptar nuk figuronte mes të shpëtuarve, çka ka shtyrë familjarët e tij të kërkojnë ndihmë publike për gjetjen e tij. I vëllai, Erizon Nika, ngriti dyshime se ai mund të jetë transportuar në ndonjë spital në Rusi ose mund të ketë mbetur i bllokuar në dhomën e motorëve.

Aktualisht, mjeti detar po rimorkiohet drejt Turqisë ku pritet të kryhet një kontroll i imtësishëm në të gjitha ambientet e mbyllura të saj. Përveç dëmeve materiale, autoritetet nuk kanë konfirmuar ende zyrtarisht nëse ka pasur viktima nga ky incident.