PRISHTINË – Këshilli Prokurorial i Kosovës (KPK) ka marrë vendim të premten për shkarkimin nga detyra të Kryeprokurorit të Prokurorisë Speciale të Republikës së Kosovës, Blerim Isufaj. Vendimi u mor gjatë një mbledhjeje të jashtëzakonshme të thirrur posaçërisht për të vlerësuar performancën dhe rezultatet e tij në krye të këtij institucioni.

Në arsyetimin e tij, Këshilli Prokurorial përmendi problematika në menaxhim, dështim në përmbushjen e përgjegjësive ligjore dhe mosarritje të standardeve të kërkuara të performancës si shkaqe kryesore për shkarkimin e tij. Pas marrjes së këtij vendimi, KPK-ja ka caktuar prokurorin Dren Paca si ushtrues detyre të kryeprokurorit të Prokurorisë Speciale, funksion të cilin do ta ushtrojë deri në përzgjedhjen e drejtuesit të ri sipas procedurave ligjore, ndërsa Isufaj do të vijojë punën si prokuror pranë këtij institucioni.