PRISHTINË – Kryeministri i Kosovës, Albin Kurti, ka publikuar një fotografi nga takimi me Presidentin e Shteteve të Bashkuara, Donald Trump, ku shfaqet së bashku me të dhe bashkëshorten e tij, Rita Augestad Knudsen.

Sipas Kurtit, takimi u zhvillua në kuadër të Javës së Nivelit të Lartë të Asamblesë së Përgjithshme të Kombeve të Bashkuara.

Përmes një postimi në rrjetet sociale, kryeministri i Kosovës tha se kjo ishte hera e parë që takonte nga afër presidentin amerikan.

“Kisha nderin që të takoj për herë të parë Presidentin e Shteteve të Bashkuara të Amerikës, z. Donald J. Trump”, shkroi Kurti.

Sipas deklarimit të tij, gjatë takimit Kurti e falënderoi Trump për rritjen e investimeve në mbrojtje brenda NATO-s. Ai theksoi gjithashtu synimin e Kosovës për anëtarësim në Aleancën e Atlantikut të Veriut.

Në postimin e tij, Kurti e cilësoi Shtetet e Bashkuara si aleatin kryesor dhe partnerin e pazëvendësueshëm të Kosovës, duke nënvizuar rëndësinë që Prishtina i atribuon marrëdhënieve me Uashingtonin.