TIRANË — Tensione të fortë dhe përplasje verbale e fizike kanë ndodhur sot pranë selisë së Kuvendit të Shqipërisë.

Deputeti i Partisë Socialiste, Erion Braçe, është përballur me reagimin e ashpër të banorëve të Memaliajt që protestonin jashtë godinës.

Qytetarët kishin zbarkuar në kryeqytet për të kundërshtuar hapur projektin për shkrirjen e Bashkisë Memaliaj dhe bashkimin e saj me Tepelenën.

Protesta përkoi me kohën kur në Komisionin e Ligjeve po diskutoheshin ndryshimet e nxehta në Reformën Administrative-Territoriale.

Gjatë kalimit të deputetit, situata ka degjeneruar kur një prej banorëve të revoltuar i ka hedhur ujë në fytyrë Erion Braçes.

Në vendngjarje kanë ndërhyrë menjëherë edhe deputetë të opozitës për të shmangur përshkallëzimin e mëtejshëm të dhunës fizike.

Reagimi i banorëve vjen në një kohë kur debati për hartën e re territoriale ka ndezur reagime të shumta publike e politike.