TIRANË — Gjykata e Tiranës ka lënë në fuqi masën e sigurisë "Arrest me burg" për shtetasin Eraldo Fizi.

I riu akuzohet si shkaktari kryesor i vetëvrasjes së ish-bashkëshortes së tij 25-vjeçare, Xhuana Nikollaj, ngjarje e ndodhur në mars.

Para hetuesve, Eraldo Fizi ka pranuar se e ka dhunuar fizikisht 25-vjeçaren vetëm një ditë përpara se ajo të kryente aktin fatal.

I arrestuari ka shfaqur pendesë para togave të zeza, por ka mohuar pretendimet se ka ushtruar dhunë sistematike ndaj viktimës.

E reja i dha fund jetës duke konsumuar lëndë helmuese fostoksinë në apartamentin ku jetonte me qira në kryeqytet.

Hetimet zbuluan se pas ndarjes, Fizi e përndiqte dhe e kërcënonte me këmbëngulje të renë pasi ajo refuzonte ribashkimin.

I shpallur në kërkim prej muajsh nga policia, Fizi u vetëdorëzua në organet e rendit më 30 shtator për t’u përballur me drejtësinë.