PRISHTINË – Kryeministri i Kosovës, Albin Kurti, ka deklaruar se kanë nisur komunikimet me subjektet politike në vend për të arritur një marrëveshje rreth zgjedhjes së presidentit të ri, duke e cilësuar këtë fundjavë si përcaktuese për sigurimin e votave të nevojshme.

Kurti shprehu optimizmin se marrëveshja mund të arrihet brenda ditëve në vijim, me synimin që Kuvendi i Kosovës të votojë kreun e ri të shtetit gjatë javës së ardhshme. Zhvillimet politike vijnë në kushtet e presionit kohor, pasi Gjykata Kushtetuese ka caktuar 6 tetorin si afatin e fundit kushtetues për përmbylljen e procedurës së zgjedhjes së presidentit. Nëse deputetët nuk arrijnë të zgjedhin presidentin e ri brenda këtij afati, vendi rrezikon të shkojë automatikisht në zgjedhje të jashtëzakonshme parlamentare.