TIRANË – Gati një e pesta e energjisë elektrike (19.4%) e futur në rrjetin shqiptar nuk arrin te konsumatori final, sipas Raportit të Konvergjencës Ekonomike për Ballkanin Perëndimor 2026 të publikuar nga OECD. Kjo shifër është mbi tri herë më e lartë se mesatarja e Bashkimit Evropian prej 6% dhe e rendit Shqipërinë të dytën në rajon për nga niveli i humbjeve, pas Kosovës (21.9%).

Raporti sqaron se humbjet reflektojnë si probleme teknike të lidhura me infrastrukturën e vjetruar, ashtu edhe faktorë joteknikë që lidhen me sistemet e matjes. Përpjekjet e dekadës së fundit kanë sjellë përmirësim krahasuar me periudhën 2014-2016, duke e rritur performancën relative të Shqipërisë kundrejt BE-së nga 23 në 28.4 pikë, mirëpo hendeku me standardet evropiane mbetet ende i madh.

Pavarësisht problemeve me rrjetin, kostoja e energjisë elektrike për konsumatorët jofamiljarë në Shqipëri është afruar ndjeshëm me mesataren e BE-së, duke shënuar 98 pikë në shkallën ku BE-ja përfaqëson nivelin 100. Në nivel rajonal, çmimi mesatar për bizneset ishte 0.25 USD/kWh, teksa Kosova regjistron koston më të ulët (0.18 USD/kWh) dhe Maqedonia e Veriut më të lartën (0.38 USD/kWh).