Këngëtari i muzikës popullore, i njohur gjerësisht në qarkun e Fierit, Erind Xhaferi është arrestuar në flagrancë nga Policia e Fierit, raporton noa.al.

Burimet zyrtare të policisë lokale i thanë agjencisë së lajmeve NOA se Erind Xhaferri u konstatua se po kryente vepra të turpshme pranë një shkolle ku gjendeshin nxënës të mitur.

Noa.al mëson se aktet e dyshimta janë kryer pranë shkollës ‘Jakov Xoxa’ në qytetin e Fierit. Sipas hetimit, i dyshuari vetëprekej në publik duke shkaktuar habi dhe pasiguri sidomos për fëmijët që gjenden në shkollë.

Arrestimi erdhi pas një telefonate që u bë nga persona dëshmitarë të cilët raportuan te policia lokale se i dyshuari po përdorte vajza të mitura pranë shkollës dhe po kryente vepra të turpshme.

Policia tha se është bërë ndalimi i Xhaferit duke e shoqëruar në ambientet e Drejtorisë Vendore të Policisë Fier, ku janë kryer veprimet e mëtejshme procedurale.

Hetimi për këngëtarin po bazohet në veprën penale të parashikuar nga neni 108 i Kodit Penal, “Vepra të turpshme”. Veprimet hetimore po i referohen Prokurorisë pranë Gjykatës së Shkallës së Parë të Juridiksionit të Përgjithshëm Fier.