TIRANË – Banka e Shqipërisë ka përgatitur ndryshime rregullatore në funksionimin e sistemeve kombëtare të pagesave AIPS, AIPS Euro dhe AECH, me qëllim dhënien e aksesit të drejtpërdrejtë për institucionet financiare jo-banka, si ato të pagesave dhe të parasë elektronike.

Miratimi i rregulloreve të reja pritet të bëhet menjëherë pas votimit në Kuvendin e Shqipërisë të ndryshimeve në ligjin “Për sistemin e pagesave”, çka do të krijojë bazën e nevojshme ligjore. Kjo ndërhyrje vjen si përgjigje ndaj kërkesave të vazhdueshme të institucioneve jo-bankare pas transpozimit të Direktivës Europiane të Pagesave (PSD 2), duke synuar vendosjen e një konkurrence të barabartë në treg, ku deri më tani shlyerja e pagesave garantohej me akses direkt vetëm nga bankat tregtare.

Në kuadrin ekzistues, pjesëmarrësit e drejtpërdrejtë që kryejnë transaksione direkte nga llogaritë e tyre të shlyerjes kufizoheshin te Banka e Shqipërisë dhe bankat tregtare, ndërsa institucionet financiare jo-banka klasifikoheshin si pjesëmarrës të tërthortë duke përdorur llogaritë e bankave tregtare. Me hyrjen në fuqi të kuadrit të ri, institucionet e pagesave dhe të parasë elektronike do të gëzojnë statusin e pjesëmarrësit direkt në sistemet kryesore kombëtare, si dhe në sistemin e ri të pagesave të menjëhershme.