LEZHË – Një zjarr i madh ka shpërthyer pasditen e së enjtes në zonën mes fshatrave Manati dhe Barbullush të rrethit të Lezhës, duke krijuar situatë emergjence për shkak të afërsisë me zonat e banuara.

Flakët janë përhapur me shpejtësi në një sipërfaqe të gjerë të mbuluar me ferra e shkurre, ndërsa era e fortë që fryen në rajon po favorizon përparimin e vatrës së zjarrit dhe po ndihmon përhapjen e saj drejt banesave pranë.

Në vendngjarje kanë mbërritur menjëherë shërbimet zjarrfikëse të Lezhës, të cilat po punojnë në terren për izolimin dhe vënien nën kontroll të flakëve. Operacioni i shpëtimit po përballet me pengesa të shumta për shkak të kushteve të pafavorshme atmosferike dhe terrenit të vështirë, ndërsa forcat e rendit po monitorojnë situatën për evakuimin e mundshëm të banorëve nëse rreziku për shtëpitë rritet.