PARIS – Vala e protestave të nxënësve të shkollave të mesme në Francë po merr përmasa gjithnjë e më të dhunshme, duke shkaktuar trazira masive dhe bllokim të procesit mësimor në disa nga qytetet kryesore të vendit. Autoritetet franceze njoftuan se deri më tani janë kryer mbi 440 arrestime, ku shumica e të ndaluarve janë të mitur. Ministri i Arsimit, Édouard Geoffrey, konfirmoi se që nga fillimi i revoltës janë plagosur 76 persona, mes të cilëve nxënës dhe pjesëtarë të stafit arsimor.

Protestat, të cilat nisën në rajonin e Parisit, janë përhapur me shpejtësi në Lille, Lyon, Marsejë, Bordeaux dhe Rennes. Sipas të dhënave nga Unioni i Nxënësve të Shkollave të Mesme, bllokadat dhe protestat kanë prekur rreth 400 nga 3,700 shkollat e mesme që ka gjithsej Franca. Nxënësit denoncojnë degradimin e sistemit arsimor, mungesën e theksuar të mësuesve, oraret e ngjeshura dhe klasat e mbipopulluara ku numri i nxënësve arrin deri në 34 persona për klasë.

Në disa qytete si Lille dhe Lyon u shënuan përleshje të ashpra me forcat e rendit. Protestuesit u vunë flakën kazanëve të mbeturinave, hodhën sende të forta dhe përdorën acid klorhidrik kundër oficerëve të policisë, çka solli ndërhyrjen e menjëhershme të forcave të sigurisë me gaz lotsjellës për shpërndarjen e turmave.

Nga ana e tij, Ministri i Arsimit, Édouard Geoffrey, e dënoi ashpër dhunën e ushtruar duke e cilësuar atë të papranueshme. Ndërkohë, Ministri i Brendshëm, Laurent Nuñez, deklaroi se ndërhyrja e policisë ishte tërësisht proporcionale. Autoritetet vendore kanë nisur hetimet për zbardhjen e incidenteve dhe identifikimin e personave përgjegjës.