Sekretari i Përgjithshëm i NATO-s, Mark Rutte, ka deklaruar se aktualisht nuk ekziston një kërcënim i menjëhershëm ndaj territorit të Aleancës nga Rusia, ndërsa ka bërë thirrje që vendet evropiane të marrin më shumë përgjegjësi për sigurinë e kontinentit.

Gjatë një samiti për sigurinë të zhvilluar më 30 shtator në Bruksel, Rutte u ndal edhe te paralajmërimet e Moskës për përdorimin e armëve bërthamore në rast të një përshkallëzimi të konfliktit.

“Nuk ka kërcënim të menjëhershëm ndaj territorit të NATO-s”, deklaroi Rutte, duke shtuar se Aleanca është në gjendje të përballet me çdo situatë që mund të krijohet.

Deklaratat e tij vijnë pas tensioneve të shtuara në rajonin e Baltikut dhe paralajmërimeve të Rusisë lidhur me Kaliningradin, enklavën ruse të rrethuar nga territori i vendeve anëtare të NATO-s.

Moska ka paralajmëruar se një përpjekje për të izoluar Kaliningradin mund të çojë në një përshkallëzim serioz, duke përfshirë edhe përdorimin e armëve bërthamore.

Rutte ka tentuar të ulë shqetësimet mbi një përballje të drejtpërdrejtë mes Rusisë dhe NATO-s, duke theksuar njëkohësisht se Aleanca është e përgatitur për çdo skenar.

“Ne do të mbrojmë çdo centimetër të territorit të NATO-s”, është shprehur ai.

Kreu i NATO-s ka kritikuar gjithashtu varësinë e vazhdueshme të Evropës nga Shtetet e Bashkuara për mbrojtjen e kontinentit.

Sipas Rutte, në territorin evropian të NATO-s jetojnë rreth 600 milionë njerëz, ndërsa Rusia ka rreth 140 milionë banorë. Ai argumentoi se Evropa duhet të jetë në gjendje të marrë një pjesë më të madhe të përgjegjësisë për sigurinë e saj.

Në të njëjtën kohë, Rutte ka theksuar se Shtetet e Bashkuara mbeten pjesë e rëndësishme e mbrojtjes së Evropës dhe se bashkëpunimi transatlantik do të vazhdojë.

NATO vijon ndërkohë forcimin e krahut lindor, veçanërisht në rajonin e Baltikut, përmes shtimit të kapaciteteve të mbrojtjes ajrore, pranisë ushtarake dhe masave të tjera parandaluese.

Mesazhi i Rutte është se, pavarësisht tensioneve dhe retorikës së fortë nga Moska, NATO nuk vlerëson se aktualisht përballet me një sulm të menjëhershëm rus, por po përgatitet për çdo zhvillim të mundshëm.