TIRANË — Përpjekja e radhës për zhvillimin e seancës gjyqësore ndaj ish-presidentit Ilir Meta ka dështuar sërish këtë të enjte në GJKKO.

Shkak për dështimin e seancës u bë vijimi i bojkotit nga ana e avokatëve mbrojtës, të cilët kundërshtojnë rregulloren e re të gjykatës.

Avokatët protestojnë ndaj masave kufizuese që u ndalojnë mbajtjen e telefonave celularë brenda sallave të gjykimit.

Pavarësisht përshkallëzimit të protestës nga mbrojtja, drejtuesit e GJKKO-së refuzojnë të tërhiqen nga zbatimi i rregullores kontestuese.

Trupi gjykues vendosi të ndëshkojë sërish avokatët e Ilir Metës me një gjobë prej 5 mijë lekësh për shkak të mungesës.

Në të njëjtën kohë, Gjykata e Posaçme vendosi të pezullojë edhe një herë afatet e masës së paraburgimit për kreun e Partisë së Lirisë.

I pranishëm në sallë, vetë Ilir Meta reagoi ashpër duke e cilësuar të gjithë situatën si një skenar të parapërgatitur politikisht.

Ilir Meta: "Gjithë kjo situatë vjen me porosi të Ergys Agasit nga njerëzit e Agasit."