TIRANË — Politikanja Monika Kryemadhi ka reaguar ashpër për ngjarjen e bujshme të ditëve të fundit pas publikimit të videove intime në rrjet.

Teksa po hynte në Gjykatën e Posaçme për seancën e saj të radhës, Kryemadhi konfirmoi para gazetarëve se i kishte parë pamjet e publikuara.

Ajo shprehu keqardhje të thellë për të gjitha gratë dhe vajzat që ranë viktimë e këtij abuzimi me jetën private.

Politikanja kërkoi dënim maksimal ligjor si për personin që ka bërë regjistrimet, ashtu edhe për të gjithë ata që i kanë shpërndarë ato.

Monika Kryemadhi: "Përveç ndjenjës së shëmtuar që më la për shkak të viktimave, të gjitha atyre grave apo vajzave, kushdo që janë. Personi, i cili i ka bërë, ai që i ka regjistruar, por edhe ai që i ka shpërndarë, është një veprim shumë i ulët dhe që duhet të dënohet."

Monika Kryemadhi: "Ajo që dua të them është se nuk ka çfarë t’i duhet asnjërit se çfarë bën një njeri në dhomën e vet të gjumit apo me jetën private. E tjetra është mënyra se si ne po fillojmë të gjykojmë situatat… është e tmerrshme."

Sipas saj, është një fatkeqësi e madhe kombëtare që shoqëria shqetësohet më shumë nga videot intime sesa nga taksat e larta dhe shpopullimi i vendit.