TIRANË – Konferenca e Kryetarëve mblidhet ditën e sotme në orën 09:00 për të shqyrtuar kërkesën zyrtare të Grupit Parlamentar të Partisë Demokratike për zhvillimin e një mocioni me debat mbi shkarkimin dhe hetimet rreth ish-drejtoreshës së Shërbimit Informativ të Shtetit (SHISH), Vlora Hyseni.

Kërkesa e opozitës vjen pas publikimit të të dhënave se Hyseni, gjatë ushtrimit të detyrës, dyshohet se ka furnizuar me informacione të klasifikuara shtetasin Ergys Agasi, i cili ndodhet nën hetim nga Prokuroria e Posaçme (SPAK) për disa vepra të rënda penale.

Në dokumentin e depozituar në Kuvend, Partia Demokratike kërkon llogaridhënie të plotë dhe hetim parlamentar mbi këto pika kyçe:

Përgjegjësia Politike e Kryeministrit: Shqyrtimi i procedurave dhe kriterit të ndjekur nga Kryeministri dhe strukturat shtetërore për përzgjedhjen, emërimin, mbikëqyrjen dhe largimin e drejtuesit të SHISH.

Cenimi i Sigurisë Kombëtare: Verifikimi urgjent nëse dhe deri në çfarë mase është komprometuar informacioni i klasifikuar shtetëror, si dhe masat e marra për mbrojtjen e personelit të shërbimit sekret.

Mekanizmat e Kontrollit: Vlerësimi i dështimit të strukturave ligjore të mbikëqyrjes dhe kontrollit parlamentar mbi institucionet e sigurisë kombëtare.

Opozita kërkon që Konferenca e Kryetarëve të caktojë menjëherë datën për zhvillimin e mocionit në seancë plenare, duke garantuar se debati parlamentar do të respektojë rregullat e mbrojtjes së sekretit shtetëror dhe pavarësinë e organeve të drejtësisë.