TIRANË – Ekonomia shqiptare vijon të dominohet nga vende pune që kërkojnë kualifikim të ulët deri në të mesëm, duke reflektuar mbështetjen e lartë te krahu i lirë i punës dhe mungesën e sektorëve me vlerë të shtuar.

Sipas një raporti të Organizatës Ndërkombëtare të Punës (ILO), 74% e të punësuarve në vend janë të angazhuar në profesione me aftësi të ndërmjetme — si teknikë, operatorë, zanatçinj dhe punonjës shërbimi. Vetëm 26% e tregut mbulon nivele të tjera kualifikimi, gjë që lidhet me zhvillimin e kufizuar të teknologjisë, kërkimit shkencor dhe shërbimeve të specializuara.

Të dhënat e Agjencisë Kombëtare të Punësimit dhe Aftësive (AKPA) konfirmojnë këtë prirje: nga 68,860 pozicione të lira të shpallura gjatë vitit 2025 (një rritje prej 12% krahasuar me vitin 2024), kërkesa më e madhe ishte për profesione elementare (29.9%) dhe zanatçinj (23.7%). Ndërkohë, kërkesa për specialistë me arsim të lartë mbeti në nivele modeste prej vetëm 6.4%, duke nëvizuar nevojën urgjente për reformimin e arsimit profesional dhe inovacionit në sipërmarrjet vendase.