TIRANË – Pas publikimit dhe shpërndarjes masive në rrjete sociale e portale online të disa materialeve intime që përfshijnë figura publike në Shqipëri, Zyra e Komisionerit për të Drejtën e Informimit dhe Mbrojtjen e të Dhënave Personale, e drejtuar nga Besnik Dervishi, ka reaguar zyrtarisht duke kërkuar ndërprerjen e menjëhershme të tyre.

Komisioneri theksoi se të qenit figurë publike nuk do të thotë heqje dorë nga e drejta kushtetuese për privatësi dhe dinjitet njerëzor. Në reagim nënvizohet se kurioziteti i publikut për jetën intime të një individi nuk përbën në vetvete interes publik që mund të justifikojë publikimin e këtyre përmbajtjeve. Po ashtu, institucionalisht u sqarua se qarkullimi i mëparshëm i një materiali në internet nuk e bën të ligjshëm ripublikimin apo rishpërndarjen e tij të mëtejshme.

Zyra e Komisionerit u bën thirrje mediave, portaleve dhe përdoruesve të rrjeteve sociale të fshijnë çdo përmbajtje të publikuar në kundërshtim me Ligjin nr. 124/2024 “Për mbrojtjen e të dhënave personale”, duke paralajmëruar masa të rrepta administrative dhe penale për çdo person apo subjekt që kryen përpunim dhe shpërndarje të paligjshme të këtyre të dhënave.

Më poshtë vijon deklarata e plotë zyrtare e Zyrës së Komisionerit:

Deklarata e Zyrës së Komisionerit për të Drejtën e Informimit dhe Mbrojtjen e të Dhënave Personale:

“Në vijim të publikimeve të fundit në media dhe rrjete sociale për materiale të pretenduara intime, Zyra e Komisionerit për të Drejtën e Informimit dhe Mbrojtjen e të Dhënave Personale u bën thirrje mediave, portaleve dhe përdoruesve të rrjeteve sociale të respektojnë jetën private dhe dinjitetin e çdo individi.

Ligji nr. 124/2024 “Për mbrojtjen e të dhënave personale” ndalon përpunimin e këtyre përmbajtjeve. Gjithashtu, publikimi dhe shpërndarja e tyre është e ndaluar.

Të qënit figurë publike nuk përbën heqje dorë nga e drejta për jetë private. Kurioziteti për jetën intime të një individi nuk mjafton për të justifikuar publikimin e saj si çështje me interes publik. Liria e shprehjes dhe e informimit duhet të ushtrohet duke respektuar kushtet e nenit 43 të ligjit, përfshirë domosdoshmërinë, proporcionalitetin dhe mbrojtjen e thelbit të të drejtave themelore.

Fakti që një material qarkullon në internet nuk e bën të ligjshëm ripublikimin e tij. Çdo rishpërndarje mund të shtojë ekspozimin dhe dëmin ndaj personave të prekur dhe familjeve të tyre.

Çdokush që përpunon në mënyrë të paligjshme të dhëna personale është subjekt i masave administrative dhe penale.

Zyra e Komisionerit bën thirrje të ndërpritet publikimi dhe rishpërndarja e materialeve intime në kundërshtim me ligjin dhe të hiqen përmbajtjet e publikuara në mënyrë të paligjshme.”