TIRANË – Gjatë konferencës së përbashkët për shtyp me Kryeministrin Edi Rama në Tiranë, Presidentja e Komisionit Evropian, Ursula von der Leyen, vlerësoi progresin e bërë nga Shqipëria në rrugëtimin e saj drejt anëtarësimit në Bashkimin Evropian, duke përcjellë tri mesazhe kyçe për ecurinë e mëtejshme të këtij procesi:

Shqipëria, në vendet kryesuese të anëtarësimit: Shefja e KE-së nënvizoi se objektivi i anëtarësimit është tashmë në horizont dhe se Shqipëria ka bërë një ecuri të shkëlqyer që nga vizita e saj e mëparshme. Ajo vlerësoi përafrimin 100% të vendit me politikën e jashtme dhe të sigurisë së BE-së, duke theksuar se anëtarësimi do të forcojë si Shqipërinë, ashtu edhe vetë Bllokun Evropian.

Nevoja për thellimin e reformave: Von der Leyen vuri theksin te rëndësia e zbatimit të plotë në praktikë të reformave për të gjithë kapitujt e hapur negociues. Ajo bëri thirrje për një angazhim të vërtetë institucional që kapërcen ndasitë politike në vend.

Rezultatet e Planit të Rritjes: Presidentja e KE-së bëri me dije se Shqipëria po ecën me ritme mjaft pozitive në zbatimin e Planit të Rritjes, duke përmbushur mbi 80% të hapave të reformave të kërkuara. Kjo ecuri do t’i hapë rrugë integrimit të përbashkët tregtar dhe thithjes së investimeve direkte nga BE-ja përpara anëtarësimit të plotë.