Një tragjedi ka goditur familjen e aktorit dhe regjisorit amerikan Chad Lowe. Vajza e tij 13-vjeçare, Fiona Hepler Lowe, ka ndërruar jetë, bëjnë të ditur prindërit e saj përmes një deklarate të publikuar nga revista People.

“Jemi thellësisht të shkatërruar nga humbja e të dashurës sonë Fiona”, u shprehën Chad Lowe dhe bashkëshortja e tij, Kim Painter. Ata e përshkruan vajzën si një fëmijë të dashur, inteligjent dhe krijues, që kishte një pasion të veçantë për kërcimin.

Familja nuk ka bërë të ditura rrethanat e vdekjes së 13-vjeçares. Në deklaratën e tyre, prindërit kërkuan respektimin e privatësisë gjatë kësaj periudhe të vështirë dhe iu referuan gjithashtu linjës amerikane të mbështetjes për shëndetin mendor, 988.

Fiona kishte lindur më 16 nëntor 2012 dhe ishte vajza e dytë e Chad Lowe dhe Kim Painter, të cilët u martuan në vitin 2019. Çifti ka edhe dy vajza të tjera, Mabel, 17 vjeçe, dhe Nixie, 10 vjeçe.