Bashkia Lushnjë ka reaguar zyrtarisht pas ngordhjes masive të peshqve në rezervuarin e Kasharajt, duke njoftuar se ka depozituar kallëzim penal pranë Prokurorisë së Fierit ndaj bashkimit të kompanive që po kryejnë punimet për rehabilitimin e digës dhe shkarkuesit të rezervuarit.

Sipas Bashkisë, pas verifikimeve paraprake dyshohet se gjatë punimeve nuk janë marrë masat e nevojshme për menaxhimin e ujërave të rezervuarit, çka mund të ketë sjellë dëmtim të faunës dhe mjedisit në këtë ujëmbledhës. Institucioni thotë se kallëzimi synon zbardhjen e plotë të rrethanave dhe identifikimin e përgjegjësve.

Një tjetër shqetësim i ngritur nga Bashkia lidhet me mungesën e njoftimit nga kompania për rinisjen e punimeve. Sipas institucionit, punimet ishin ndërprerë më 9 shkurt, me kërkesë të vetë kompanisë, ndërsa në bazë të kontratës, përpara rinisjes së tyre në shtator, bashkimi i kompanive duhej të njoftonte institucionet publike, veçanërisht Bashkinë Lushnjë. Sipas Bashkisë, ky njoftim nuk është bërë.

Bashkia Lushnjë deklaron se do të bashkëpunojë me organet ligjzbatuese për zbardhjen e ngjarjes, ndërsa i kërkon Prokurorisë të përcaktojë përgjegjësitë për situatën e krijuar në rezervuarin e Kasharajt. Hetimet pritet të përcaktojnë nëse shkeljet e pretenduara gjatë zbatimit të kontratës kanë lidhje me dëmtimin e faunës dhe mjedisit.