PRISHTINË — Kryeministri i Kosovës, Albin Kurti, ka deklaruar sot gjatë mbledhjes së qeverisë se çështja e zgjedhjes së Presidentit të ri përbën një situatë urgjente që kërkon reagim të menjëhershëm institucional.

Kreu i ekzekutivit theksoi se pas aktgjykimit të Gjykatës Kushtetuese, vendi ndodhet përpara një afati prej vetëm gjashtë ditësh për të gjetur gjuhën e përbashkët. Kurti bëri thirrje për dialog dhe arritjen e një dakordësie politike me subjektet e tjera, duke e cilësuar çuarjen e vendit në zgjedhje të reja si një skenar të panevojshëm, të kushtueshëm dhe institucionalisht të rrezikshëm.

Albin Kurti: "Aktgjykimi i Kushtetuese, i cili prodhoi një normë të re kushtetuese lidhur me rrjedhjen afateve për zgjedhjen e presidentit, na vë përpara një situate urgjente për veprim. Ne kemi një marrëveshje me LDK-në, por e dimë që ajo u shkel e u braktis nga 6 deputetë të saj, përkundër që ajo kishte bekimin e kryesisë partisë së tyre. Para nesh, kemi 6 ditë të plota për t’i dhënë vendit president/e të re. Përveç arritjes së një marrëveshje të re edhe zgjedhja e presidentit është e mundshme. Zgjedhjet e reja të përsëritura, të panevojshme, të kushtueshme janë gjithsesi janë të shmangshme. Prandaj lë të ulemi bashkë, sepse zgjedhjet e reja ndonëse do të shkaktohen si pasojë e moszgjidhjes së presidentit, sërish nuk do të ishin zgjedhje për president. Ato përveçse pa Kuvend, këtë herë do të na linin me paqartësi për ushtrimin e detyrës së presidentit, ndërkaq qeveria do të mbetej në detyrë. Me lejoni të citoj pikën 3 të deklaratës që u votua me 99 vota, Kuvendi bën thirrje për hartimin e një strategjie të përbashkët shtetërore në kuadër të secilës të bashkërendohen veprimet juridike, institucionale dhe diplomatike për mbrojtjen dhe afirmimin e të vërtetës së plotë historike për luftën e drejt për liri dhe çlirim. Qytetarë presin prej nesh më shumë përgjegjësi. Kosova nuk e ka luksin të humbasë kohë në kriza të panevojshme. Kësaj here nuk do të prodhohej ndonjë rezultat ndryshe, por i kemi rrethanat e reja që kërkojnë përgjegjësi më të madhe shtetërore."