TIRANË — Kryetari i Bashkisë së Tiranës, Erion Veliaj, ka ndërmarrë ditën e sotme një valë të re shkarkimesh dhe emërimesh në nivelin drejtues të institucionit, duke e transmetuar vendimmarrjen drejtpërdrejt nga ambientet e paraburgimit të Durrësit.

Ndryshimet e konfirmuara zyrtarisht kanë prekur disa nga njësitë më të rëndësishme administrative në kryeqytet. Nga detyra janë shkarkuar administratori i Njësisë 5, Piro Jani, si dhe ai i Njësisë 2, Florian Pullazi. Paralelisht, lëvizjet përfshijnë emërimin e Trendelina Jakut nga Njësia 1 në krye të Agjencisë së Mbrojtjes së Konsumatorit, ndërsa administratori i Kasharit, Xhevahir Koçi, mori drejtimin e Agjencisë së Parqeve dhe Rekreacioneve.

Në kabinetin e tij, Veliaj ka emëruar Julinda Dhamen si këshilltare, ndërkohë që mungesa e një vendimi nga Këshilli Bashkiak për delegimin e kompetencave bën që drejtimi i administratës së kryeqytetit të vijojë zyrtarisht përmes korrespodencës nga qelia.