TIRANË — Kryeministri Edi Rama ka prezantuar këtë të mërkurë një sërë ndryshimesh thelbësore në Kodin e Procedurës Penale, që synojnë mbrojtjen e të drejtave të njeriut, jetës private dhe prezumimit të pafajësisë gjatë procesit hetimor.

Sipas kreut të qeverisë, reforma e re parashikon regjistrimin me zë dhe figurë të marrjeve në pyetje dhe veprimeve kryesore procedurale, ndërsa sanksionohet pavlefshmëria e plotë e deklaratave të marra nën presion apo dhunë. Një vëmendje e veçantë i është kushtuar gjithashtu sekuestrimit dhe kontrollit të pajisjeve elektronike, si dhe menaxhimit të përgjimeve, ku garantohet se çdo material pa lidhje me hetimin do të asgjësohet.

Edi Rama: "Marrja në pyetje dhe veprimet kryesore do të regjistrohen me zë dhe figurë. Nëse shteti merr në pyetje një njeri duhet të tregojë si e ka marrë dhe sa e ka respektuar. Dhe shkruhet se deklarimet e marra me sjellje me presion apo dhunë nuk vlen. Ndryshimi i 4 vjen si domosdoshmëri për të mbrojtur jetën private në epokën teknologjike. Sekuestrimi i pajisjes nuk mund të jetë më në asnjë mënyrë për të parë dhe lexuar apo parë gjithçka. Për ata hapur duhet vendim i gjykatës…Në rast të urgjencës të përcaktuara nga ligji, veprimi vlerësohet nga gjykata. Çdo material i nxjerrë që nuk ka lidhje me hetimin duhet të asgjësohet. E njëjta gjë në lidhje me përgjimet, duhet të shikohet vetëm ato që kanë lidhje me hetimet. Personi ka të drejtë të dijë se ndaj tij është regjistruar një procedim. Hetimet e fshehura në kohë nuk mund të jenë një rutinë në një shtet të së drejtës. Në gjyq do të shkojnë çështje që kanë perspektivë reale. Prokurori duhet të peshojë provat e akuzat dhe mbrojtjen. Ndryshimi i gjashtë ka rëndësi sepse nxjerr prezumin e pafajësisë jashtë sallës së gjyqit. Gjyqi në Pazar përpara gjyqit në sallë nuk është drejtësi."