LUSHNJË — Ka nisur operacioni i pastrimit në rezervuarin e Kasharajt në Lushnjë, ku mijëra peshq ngordhën si pasojë e zbrazjes së ujit gjatë punimeve për rikonstruksionin e digës dhe shkarkuesit.

Forcat e Armatosura, Bordi i Kullimit dhe Bashkia e Lushnjës janë angazhuar me mjete të rënda në terren për largimin e sasisë së peshqve të ngordhur dhe pastrimin e plotë të ujëmbledhësit. Paralelisht me punën në terren, policia ka vënë nën hetim shtetasin Fredi Mara, 58 vjeç, administrator i firmës kontraktore që po kryen rehabilitimin e veprës. Sipas organit të akuzës, kompania nuk mori masat e duhura për menaxhimin e ujërave gjatë punimeve, ndërsa hetimet po vijojnë për veprat penale të dëmtimit të habitateve dhe ndotjes së mjedisit.

Ermal Nufi: "Ka ndodhur që është zbrazur rezervuari dhe peshku ka dalë në sipërfaqe. Po punojmë me forcat e bashkisë dhe ato të Armatosura që të bëjmë të mundur të largojmë rrjetën që ka bllokuar veprën ujëdalëse. Në momentin që do të bëjmë të mundur që të lirohet kanali i bllokuar dhe uji që mbetet ende në basenin e rezervuarit, do të bëhet e mundur forca e të gjithë mjeteve për të pastruar rezervuarin e mbetur dhe peshkut. Besoj shumë shpejt, brenda ditës së sotme, maksimumi nesër, situata do të jetë normalizuar."

Nga ana tjetër, inxhinieri hidroteknik i Bordit të Kullimit Fier, Ferdinant Dervishi, ka deklaruar se zbrazja ishte e vetmja mënyrë për të hapur portat e bllokuara.

Ferdinant Dervishi: "Ky është rezervuar i kategorisë së parë, me rrezikshmëri të lartë, 3 porta sigurie. Në momentin që vjen pika e vdekjes, që mbushet kulla e marrjes së ujit, kjo vepër duhet të ngrihet që rezervuari të funksionojë. Me ndërhyrjen, do të arrihet mbilartësimi. E vetmja mënyrë është shkarkimi i rezervuarit. Kjo është e parashikuar edhe nga rregullorja që thotë çdo fund shtatori duhet të kontrollohen shkarkuesit, kullat e marrjes së ujit. Ndërhyrja është e domosdoshme, ndryshe do të shkaktonte katastrofë në qytetin e Lushnjës. Nuk ka mënyrë tjetër për hapjen e portave të ujit."

Në vendngjarje ka shkuar edhe Ministri i Bujqësisë, Andis Salla. I pyetur se kujt i takonte përgjegjësia për peshqit që ndodheshin në ujëmbledhës përpara zbrazjes së tij, ministri drejtoi gishtin nga pushteti vendor.

Andis Salla: “Kjo është totalisht e bashkisë. Ne jemi në ndihmë të bashkisë dhe për ta asistuar në të gjithë mënyrën me Bordin e Kullimit, me drejtorin e Peshkimit dhe gjithë stafin e Ministrisë së Bujqësisë.”

Sipas deklaratës së ministrit Salla, subjekti privat që kishte kontratën për shfrytëzimin e peshkut deri në vitin 2022 ishte njoftuar zyrtarisht nga bashkia për të bërë largimin e tij përpara se të niste ndërhyrja teknike në rezervuar.