DURRËS — Një shpërthim me lëndë plasëse ka ndodhur në orët e para të mëngjesit të sotëm në zonën e Fllakës në Durrës, ku objektiv i sulmit ka qenë dera e jashtme e një lokali.

Ngjarja është regjistruar rreth orës 05:00. Nga shpërthimi nuk raportohet për persona të lënduar, por janë shkaktuar vetëm dëme të konsiderueshme materiale në hyrjen e ambientit tregtar.

Forcat e policisë kanë mbërritur menjëherë në vendngjarje, ndërsa grupi hetimor po kryen veprimet e nevojshme për të përcaktuar llojin dhe sasinë e lëndës eksplozive të përdorur. Po ashtu, autoritetet po këqyrin kamerat e sigurisë në zonë për të bërë të mundur identifikimin dhe kapjen e autorëve të këtij sulmi.

Durrës/Informacion paraprak

Rreth orës 05:00, në Sektor Fllakë, në derën e lokalit në përdorim të shtetasve R. B. dhe E. B., dyshohet se ka shpërthyer një sasi e vogël lënde plasëse. Si pasojë janë shkaktuar vetëm dëme materiale.

Në vendngjarje shkuan shërbimet e Policisë dhe grupi hetimor, i cili vijon veprimet për zbardhjen e rrethanave, identifikimin dhe kapjen e autorit/autorëve.