UASHINGTON – Presidenti i Shteteve të Bashkuara, Donald Trump, dhe drejtuesit e kompanive më të mëdha të teknologjisë në botë kanë nënshkruar një marrëveshje vullnetare për vetërregullimin e industrisë dhe forcimin e standardeve të sigurisë në inteligjencën artificiale. Dokumenti zyrtar, i titulluar “White House Accord on Super Intelligence – Joint Commitment on Frontier Responsibilities”, u prezantua pas një takimi të nivelit të lartë në Shtëpinë e Bardhë me figura kryesore si Elon Musk, Mark Zuckerberg, Sundar Pichai, Jensen Huang, Jeff Bezos, Greg Brockman dhe Dario Amodei.

Gjatë prezantimit, Trump e cilësoi paktin si një hap historik për mbrojtjen e vendit dhe avancimin e teknologjisë, duke e krahasuar atë me një "kushtetutë" për sektorin. Ndonëse marrëveshja nuk është ligjërisht detyruese dhe nuk parashikon sanksione shtetërore apo trupa të drejtpërdrejtë mbikëqyrës, kreu i Shtëpisë së Bardhë theksoi se ajo mbart një pakt “moralisht detyrues”. Kuadri i miratuar përcakton katër nivele kontrolli të brendshëm për modelet më të avancuara, duke përfshirë monitorimin e trajnimeve, ngritjen e ekipeve të mbikëqyrjes, auditimet nga vlerësues të jashtëm dhe krijimin e strukturave të pavarura pranë bordeve drejtuese.

Paralelisht me këtë pakt, Presidenti Trump nënshkroi një urdhër ekzekutiv me anë të të cilit vendos ndryshimin e terminologjisë zyrtare në komunikimet e qeverisë federale, ku termi "Inteligjencë Artificiale" zvendësohet zyrtarisht me "Super Intelligence" (SI). Sipas presidentit amerikan, fjala "artificiale" nuk pasqyron më fuqinë reale të kësaj teknologjie, ndërsa riemërtimi synon të rikonfirmojë primatin dhe avantazhin konkurrues të SHBA-së në tregun global të teknologjisë.