TIRANË – Një aksident me pasoja fatale ka ndodhur mbrëmjen e së martës në zonën e Pezës, ku një adoleshent 16-vjeçar ka humbur jetën, ndërsa bashkëmoshatari i tij 15-vjeçar ka mbetur i plagosur. Ngjarja e rëndë ka ndodhur kur 16-vjeçari, i cili po drejtonte automjetin, ka humbur kontrollin mbi timon duke bërë që mjeti të dalë nga rruga kryesore e të përfundojë i përplasur në kanal.

Nga goditja e fortë, drejtuesi i mitur ka pësuar dëmtime të rënda që i morën jetën në vendngjarje. Ndërkaq, pasagjeri 15-vjeçar është transportuar me urgjencë drejt spitalit për ndihmë mjekësore, ku sipas bluzave të bardha ndodhet jashtë rrezikut për jetën.

Nga verifikimet e para hetimore të kryera nga uniformat e plota rezulton se 16-vjeçari e kishte marrë automjetin fshehurazi dhe pa lejen e babait të tij. Policia dhe grupi hetimor po vijojnë punën në terren për zbardhjen e plotë të rrethanave dhe shkaqeve të këtij aksidenti tragjik.