TIRANË – Këshilli Kombëtar i Territorit dhe Ujit (KKTU) ka miratuar gjatë mbledhjeve të fundit të korrikut dhe gushtit të paktën 16 leje zhvillimi, ndërtimi dhe rishikimi kushtesh për projekte me lartësi nga 15 deri në 43 kate mbi tokë. Harta e këtij zhvillimi intensiv urban kryesohet nga Tirana, ndërsa një pjesë e konsiderueshme e godinave shumëkatëshe, resorteve e komplekseve rezidenciale shtrihet përgjatë vijës bregdetare nga Durrësi, Vlora, Shëngjini e deri në Spille.

Projektet më të larta të miratuara në këtë seri vendimesh përfshijnë:

Garda Tower (Tiranë): 43 kate mbi tokë (banim, hoteleri dhe shërbime)

M-21 (Tiranë): 26 kate mbi tokë (shërbim dhe banim)

Rijetëzimi i Stadiumit “Selman Stërmasi” (Tiranë): Dy struktura të veçanta prej 25 kate dhe 23 kate mbi tokë (shërbime, banim dhe hoteleri)

Elite Tower (Tiranë): 24 kate mbi tokë (banim dhe shërbime)

Vertical Village (Tiranë): 23 kate mbi tokë (banim dhe shërbime)

Kompleks rezidencial dhe shërbimesh (Durrës): 21 kate mbi tokë

Godinë banimi dhe hoteleri “Elbavo” (Tiranë): 19 kate mbi tokë

Vertical Community (Tiranë): 18 kate mbi tokë

Uzina Residence (Tiranë): 16 kate mbi tokë

Godinë banimi dhe shërbime (Vlorë): 16 kate mbi tokë

Godina banimi dhe shërbimi (Kamëz): 16 kate mbi tokë

Objekt banimi dhe shërbimi (Tiranë): 16 kate mbi tokë

Scarlet Tower (Tiranë): 15 kate mbi tokë

The Wave (Spille, Rrogozhinë): Apart-Hotel 15 kate mbi tokë

Duna (Shëngjin, Lezhë): 15 kate mbi tokë

Invest Society (Tiranë): 15 kate mbi tokë

Përveç zhvillimit të sektorit të ndërtimit civil e hotelerisë, KKTU ka dhënë dritën e gjelbër edhe për një sërë investimesh strategjike në infrastrukturë dhe energji. Mbledhjet e Këshillit përfshinë miratimin e lejeve për burime të ripërtëritshme, përfshirë hidrocentrale dhe impiante të mëdha fotovoltaike me kapacitet që arrin në dhjetëra megavat, duke synuar rritjen e prodhimit vendas të energjisë.