GJIROKASTËR – Një situatë emergjence është regjistruar gjatë orëve të mbrëmjes në rrethin e Gjirokastrës, ku një vatër e përmasave të konsiderueshme zjarri ka kërcënuar drejtpërdrejt zonat e banuara. Flakët kanë shpërthyer rreth orës 21:35 në afërsi të Nyjës së Urës së Kardhiqit, duke u përhapur me shpejtësi të madhe për shkak të terrenit të favorshëm.

Me mbërritjen e menjëhershme në vendngjarje, repartet e shërbimit zjarrfikës konstatuan se zjarri po zhvillohej me përmasa të mëdha, i ushqyer nga barishtet e thata, shkurret dhe kallamishtet e zonës. Flakët u afruan rrezikshëm pranë disa banesave private dhe magazinave industriale përreth, duke krijuar panik te banorët dhe rrezikuar djegien e objekteve.

Falë ndërhyrjes operative dhe me intensitet të lartë të forcave zjarrfikëse, u bë e mundur izolimi i shpejtë i vatrës dhe shmangia e depërtimit të flakëve drejt zonave të banuara. Pas një përballjeje disaorëshe me flakët, zjarri u shua plotësisht pa shkaktuar dëme materiale në banesa apo lëndime në njerëz. Autoritetet po vijojnë punën për përcaktimin e shkaqeve të rënies së zjarrit.