RABAT – Mbreti Mohammed VI i Marokut ka dekretuar zyrtarisht emërimin e Fatima Ezzahra El Mansouri-t në postin e Kryeministres, duke i besuar detyrën e formimit të cabinetit të ri qeveritar pas përfundimit të zgjedhjeve parlamentare. Ky vendim përbën një kthesë historike për Mbretërinë e Marokut, pasi El Mansouri bëhet gruaja e parë në historinë e këtij shteti afrikanoverior që merr drejtimin e ekzekutivit. Monarku e priti kryeministren e re në Pallatin Mbretëror në Rabat, ku i uroi sukses në detyrën e re, ndërsa vetë Mbreti vazhdon të ruajë kompetencat kyçe mbi sektorët strategjikë të mbrojtjes dhe politikës së jashtme.

El Mansouri, 50 vjeçe me profesion avokate, mban postin e koordinatores kombëtare të Partisë së Autenticitetit dhe Modernitetit (PAM), një forcë e qendrës së djathtë që doli fituese në zgjedhje duke siguruar 97 nga 395 vendet në Dhomën e Përfaqësuesve. Meqenëse kjo shifër nuk garanton shumicën absolute, kryeministres së re do t’i duhet të udhëheqë bisedime intensive për krijimin e një koalicioni të gjerë qeverisës. Politikanja e njohur ka një karrierë të gjatë institucionale, ku që nga viti 2009 shërbeu si kryetare e Bashkisë së Marrakeshit e më pas si Ministre e Strehimit në kabinetin e mëparshëm.

Zgjedhjet e fundit sollën një hartë të re politike në Rabat, ku subjekti RNI i kryeministrit në largim, Aziz Ahanoush, pësoi rënie duke u renditur i dyti me 66 mandate, i ndjekur nga Partia Istiqlal me 65 vende. Ndërkaq, në kampin opozitar, Partia për Drejtësi dhe Zhvillim (PJD) shënoi një rritje të ndjeshme nga 13 në 54 mandate, megjithëse drejtuesit e saj kanë refuzuar hyrjen në qeverinë e re. Qeveria e re e kryesuar nga El Mansouri do të ketë përpara detyrën për të realizuar premtimet elektorale, përfshirë arritjen e një rritjeje ekonomike prej 5% në vit, uljen e inflacionit në 2% dhe krijimin e rreth një milion vendeve të reja të punës.