Specialistët e Qarkullimit Rrugor kanë arrestuar në flagrancë shtetasin A. N., 18 vjeç, banues në Belsh, i cili aksidentoi një të mitur 14-vjeçare në fshatin Shalës të Cërrikut. Sipas njoftimit zyrtar të policisë, i riu po lëvizte me motomjet pa leje drejtimi dhe menjëherë pas përplasjes u largua nga vendi i ngjarjes.

Ndërhyrja e shpejtë e shërbimeve të Policisë bëri të mundur lokalizimin dhe kapjen e autorit brenda një kohe të shkurtër. E mitura është dërguar me urgjencë në spital ku ndodhet nën kujdesin e mjekëve, ndërsa materialet procedurale ndaj 18-vjeçarit i janë referuar Prokurorisë për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.