Një shpërthim i fuqishëm ka ndodhur gjatë mesditës së sotme në një ndërtesë banimi në Neuchâtel të Zvicrës, duke lënë të plagosur katër persona. Si pasojë e dëmtimeve të rënda, njëri prej të lënduarve është transportuar me urgjencë drejt spitalit përmes një helikopteri mjekësor, ndërsa në një nga apartamentet e katit të parë ka shpërthyer një zjarr masiv.

Zjarrfikësit ndërhynë me shpejtësi duke e vënë vatrën e zjarrit nën kontroll, megjithëse ndërtesa pësoi dëme të dukshme në fasadë dhe dritare. Autoritetet vendore kanë rrethuar zonën përreth për disa orë dhe kanë nisur hetimet për të zbardhur shkaqet dhe rrethanat e plota të këtij shpërthimi.