MALIQ — Detaje të reja janë zbardhur nga konflikti me thikë i ndodhur gjatë ditës së sotme në fshatin Sovjan të bashkisë Maliq, ku mbeti i plagosur shtetasi Ilir Hamolli.

I dëmtuari është transportuar në urgjencën e spitalit të Korçës, ku po merr ndihmën e nevojshme mjekësore. Mjekët bëjnë me dije se ai ka marrë një plagë në pjesën e barkut, por ndodhet jashtë rrezikut për jetën.

Sipas dëshmive të banorëve të zonës, përplasja mes dy personave ka startuar për shkak të një konflikti banal lidhur me qentë e stanit dhe kullotjen e bagëtive.

Policia ka identifikuar autorin e dyshuar të ngjarjes, shtetasin me iniciale M.R., i cili është larguar menjëherë nga vendngjarja dhe ndodhet ende në arrati. Forcat e rendit kanë ngritur pika kontrolli dhe po vijojnë krehjen e zonës për kapjen e tij, si dhe për dokumentimin e plotë ligjor të rrethanave të këtij incidenti.