BRUKSEL — Komisioni Evropian pritet të miratojë dhe publikojë më 7 tetor strategjinë e re të zgjerimit, e cila parashikon kufizimin e disa të drejtave për shtetet që do t’i bashkohen në të ardhmen Bashkimit Evropian, përfshirë heqjen e përkohshme të të drejtës së vetos.

Sipas draftit të dokumentit strategjik, propozimet synojnë të parandalojnë bllokimin e proceseve vendimmarrëse brenda bllokut pas pranimit të anëtarëve të rinj. Plani parashikon që anëtarët e ardhshëm të zotohen paraprakisht për të mos përdorur të drejtën e vetos për çështje institucionale dhe për proceset e zgjerimeve të mëtejshme gjatë viteve të para të anëtarësimit.

Përveç kësaj, strategjia përfshin masa mbrojtëse financiare dhe institucionale që i japin të drejtë BE-së të pezullojë fondet apo të drejta të caktuara të anëtarësimit nëse një shtet i ri devijon nga detyrimet për sundimin e ligjit. Ndryshimet prekin gjithashtu përbërjen e Ekzekutivit Evropian, ku propozohet që numri i komisionerëve të reduktohet në dy të tretat e numrit të shteteve anëtare përmes një sistemi rotacioni.

Dokumenti propozon gjithashtu kalimin nga parimi i unanimitetit te votimi me shumicë të kualifikuar për hapat ndërmjetës të procesit të zgjerimit, siç janë hapja dhe mbyllja e kapitujve negociues, ndërsa unanimiteti do të mbetet kusht vetëm për vendimin përfundimtar të pranimit.