TIRANË — Struktura e Posaçme Kundër Korrupsionit dhe Krimit të Organizuar (SPAK) ka refuzuar kërkesën e Këshillit Bashkiak të Tiranës për lejimin e pjesëmarrjes së Kryetarit të Bashkisë, Erion Veliaj, në mbledhjen e parashikuar për t’u zhvilluar ditën e sotme në orën 15:00.

Këshilli Bashkiak i kishte përcjellë një kërkesë zyrtare SPAK-ut dhe Drejtorisë së Përgjithshme të Burgjeve, ku kërkohej prania fizike e Veliajt ose mundësimi i lidhjes me videokonferencë nga ambientet e paraburgimit ku ai ndodhet aktualisht, duke argumentuar se prania e tij ishte e nevojshme për shqyrtimin e çështjeve kyçe funksionale, përfshirë diskutimet mbi projektligjin për ndarjen e re administrativo-territoriale. Në kërkesë u citua edhe një vendim i Gjykatës Kushtetuese i nëntorit 2025 lidhur me ushtrimin e përgjegjësive institucionale.

Mirëpo, organi i akuzës ka rrëzuar kërkesën duke u bazuar në ligjin nr. 81/2020 "Për të drejtat dhe trajtimin e të dënuarve me burgim dhe të paraburgosurve", i cili përcakton kushtet rigoroze të regjimit dhe kufizimet ligjore për personat që ndodhen në masën e sigurimit "arrest në burg".