Pas ndërprerjes së importeve nga Brazili prej datës 3 shtator 2026, shitësit dhe përpunuesit e mishit në vend paralajmërojnë një rritje të ndjeshme të çmimeve për mishin e freskët të viçit, të pulave, si dhe nënproduktet e tyre.

Çmimet pritet të rriten nga 12% deri në 40% duke nisur nga muaji nëntor, ndërsa piku i shtrenjtimit parashikohet gjatë muajit dhjetor.

Ndalimi i importit të mishit dhe nënprodukteve të tij nga Brazili, Argjentina dhe gjetkë, vjen si pasojë e përshtatjes së legjislacionit shqiptar me rregulloren e re të Komisionit Evropian (BE 2026/1189), e cila ka vendosur kufizime për produktet me origjinë shtazore nga stabilimentet braziliane që nuk plotësojnë standardet e reja për përdorimin e produkteve antimikrobike.

Aktualisht, tregu vendas nuk e ka reflektuar ende këtë ndryshim në çmimet e pakicës, pasi kompanitë po shfrytëzojnë rezervat e siguruara përmes kontratave të lidhura përpara hyrjes në fuqi të urdhrit.

Sidoqoftë, përpunuesit bëjnë të ditur se stoku në magazina mund të zgjasë vetëm gjatë periudhës shtator-tetor.

Kalimi drejt tregjeve alternativë evropiane si Ukraina apo Rumania, si dhe drejt vendeve të tjera të Amerikës Latine si Argjentina, Paraguaji e Uruguaji, sjell kosto furnizimi dukshëm më të larta, pasi çmimet në këto tregje janë 12% deri 40% më të shtrenjta krahasuar me ato braziliane.

Efekti më i drejtpërdrejtë do të ndihet te filetoja e pulës, e cila përbën deri në 15% të importeve të disa kompanive dhe përdoret gjerësisht për përpunimin e proshutës. Çmimi i saj me shumicë pritet të rritet nga 320-330 lekë/kg që është aktualisht, në rreth 450 lekë/kg.

Po ashtu, mishi i viçit në tregun e pakicës pritet të pësojë një rritje prej 300 deri në 400 lekë për kilogram. Nga niveli aktual prej 1,300-1,350 lekë/kg, mishi i viçit parashikohet të arrijë në 1,600 deri në 1,700 lekë për kilogram gjatë muajve të ardhshëm.

Sipas të dhënave të INSTAT për 8-mujorin e vitit 2026, Brazili mbante peshën kryesore të furnizimit me 33% të totalit të importeve të grupit "mish dhe të brendshme të ngrënshme", i ndjekur nga SHBA-ja dhe Greqia.

Ndalimi i importit është kërkuar zyrtarisht nga Ministria e Bujqësisë dhe Zhvillimit Rural, e cila i ka udhëzuar Autoritetit Kombëtar të Ushqimit (AKU) të njoftojë operatorët ekonomikë për zbatimin e rreptë të rregullave të reja sanitare.