Deputeti i Partisë Demokratike, Agron Gjekmarkaj, ka deklaruar se emërimi i ambasadorit të ri të Shteteve të Bashkuara në Shqipëri, Eric Wendt, përbën një vlerësim për vendin nga ana e administratës së Presidentit Donald Trump.

Sipas përfaqësuesit opozitar, përvoja ushtarake dhe autoriteti i diplomatisë së re amerikane pritet të ndikojnë pozitivisht në rikthimin e vendit në kuadrin dhe shinat kushtetuese.

Gjekmarkaj u ndal edhe te hetimet e fundit që përfshijnë ish-drejtuesen e Shërbimit Informativ Shtetëror, duke e cilësuar ngjarjen si një situatë mjaft serioze që ndikon drejtpërdrejt edhe në marrëdhëniet me agjencitë partnere të zbatimit të ligjit në SHBA.

Sipas tij, bashkëpunimi i mundshëm mes drejtuesve të inteligjencës dhe elementëve të krimit të organizuar përbën një precedent të pazakontë për sigurinë e vendit.