LEZHË- Një zjarr ka përfshirë pasditen e sotme një sipërfaqe me bimësi në fshatin Lalm i Ri, në Lezhë, duke krijuar shqetësim për banorët e zonës.

Flakët, të favorizuara nga era e fortë, janë përhapur me shpejtësi dhe në disa momente janë afruar pranë banesave, duke rritur rrezikun për përhapjen e zjarrit.

Forcat zjarrfikëse kanë mbërritur menjëherë në vendngjarje dhe kanë nisur ndërhyrjen për vënien nën kontroll të flakëve. Aktualisht vijon puna për shuarjen e vatrave të mbetura aktive dhe izolimin e plotë të zonës së përfshirë nga zjarri.

Për momentin nuk raportohet për persona të lënduar, ndërsa autoritetet po monitorojnë situatën për të parandaluar afrimin e flakëve drejt banesave.

Shkaqet e rënies së zjarrit ende nuk janë bërë të ditura. Policia ka nisur verifikimet për të përcaktuar rrethanat dhe shkakun e incidentit.

Banorët e zonës janë të shqetësuar për përhapjen e mëtejshme të flakëve, veçanërisht për shkak të erës, ndërsa ekipet në terren vijojnë betejën me vatrat e zjarrit.