TIRANË — Zbardhen detaje të reja nga operacioni i koduar "Seen", i cili çoi në arrestimin në flagrancë të dy të rinjve Edison Korra, 24 vjeç, dhe Orest Balla, 23 vjeç, teksa po merrnin 100 mijë euro nga një 64-vjeçar përmes mashtrimit kompjuterik.

Hetimet e thelluara të Seksionit për Hetimin e Krimeve Ekonomiko-Financiare dhe Forcës së Posaçme "Operacionale" kanë zbuluar se pas këtij episodi dyshohet se fshihet Florian Gjergji, një emër i shpallur në kërkim ndërkombëtar, i cili drejton skemat e mashtrimit nga distanca.

Në këtë rast, autorët kishin hapur një profil të rremë në rrjetet sociale duke përdorur të dhënat e një personi të njohur të 64-vjeçarit dhe janë prezantuar në emër të Kryetarit të Federatës Shqiptare të Futbollit, Armand Duka, për t’i kërkuar shumën e madhe të parave.

Sipas policisë, skema e përdorur mban vulën e Florian Gjergjit, i cili në epizode të mëparshme ka shfrytëzuar identitetet e figurave të njohura publike e politike, si Erion Veliaj, Taulant Balla apo Tonin Marinaj, për t’ju zhvatur para biznesmenëve dhe personave të ndryshëm.

Dy të rinjtë e arrestuar kishin rolin e sekserëve në terren për mbledhjen e shumës monetare. Materialet i janë referuar Prokurorisë së Tiranës, ndërsa hetimet vijojnë për zbulimin e plotë të rrjetit dhe personave të tjerë të përfshirë.