TIRANË — Detaje të reja janë zbardhur nga operacioni i Antidrogës së Tiranës i finalizuar me arrestimin e 31 personave, të cilët akuzohen për shpërndarje të lëndëve narkotike në afërsi të shkollave dhe në disa nga zonat më kryesore të kryeqytetit.

Strukturat hetimore kanë dokumentuar veprimtarinë e të paktën 8 grupeve të ndryshme që operonin në bazë territori, përfshirë Laprakën, Brakën, rrugën "Jordan Misja", Selitën, Yzberishtin, Alliasin, Tregun Elektrik dhe Qytetin Studenti. Secili grup përbëhej nga 3 deri në 4 persona që mbulonin shitjen me pakicë. Hetimet zbuluan se grupet bashkëpunonin ngushtë me njëri-tjetrin; në rastet kur njërit prej tyre i mbaronte lëndja narkotike, klientët orientoheshin menjëherë drejt pikave të tjera të rrjetit.

Aktiviteti kriminal u dokumentua gjatë një hetimi katërmujor përmes përdorimit të agjentëve të infiltruar dhe blerjeve të stimuluara. Në kuadër të këtij aksioni u goditën edhe 5 persona të dyshuar si furnizues kryesorë që siguronin lëndët narkotike të llojit kokainë dhe heroinë.

Mes furnitorëve të identifikuar është Ferit Xhani, i njohur me pseudonimin "Luzi", person me precedentë të mëparshëm penalë për drogë dhe plagosje. Gjithashtu, rol kyç në këtë strukturë luante edhe ish-efektivi i policisë Engrid Henaj, i përjashtuar më parë nga radhët e policisë për vjedhje.

Për t’i shpëtuar zbulimit dhe kontrolleve të policisë, shpërndarësit përdornin metoda kamuflazhi duke u zhvendosur me monopatina elektrike apo duke përdorur shërbimet e taksive dhe motomjeteve të transportit të shpejtë ("delivery"). Hetimet vijojnë për kapjen e 14 personave të tjerë të shpallur në kërkim.