MALIQ — Këshilli Bashkiak i Maliqit ka dalë zyrtarisht kundër propozimit të Partisë Socialiste për reformën e re administrativo-territoriale, e cila parashikon shkrirjen e kësaj njësie dhe bashkimin e saj me Bashkinë e Korçës.

Gjatë mbledhjes së zhvilluar për shqyrtimin e këtij propozimi, anëtarët e këshillit diskutuan mbi efektet e ndryshimeve të propozuara territoriale. Në përfundim të procesit të votimit, nga 22 këshilltarë të pranishëm, 21 prej tyre votuan kundër bashkimit me Korçën, ndërsa vetëm një votë u regjistrua pro propozimit.

Përmes këtij vendimi, Këshilli Bashkiak i Maliqit ka zyrtarizuar qëndrimin e tij institucional, i cili pritet t’i përcillet Kuvendit të Shqipërisë si dokumentacion zyrtar gjatë procesit të shqyrtimit të reformës territoriale.