PËRDITËSIM: Identifikohet personi që humbi jetën nga zjarri në Fier, e pati të pamundur të dilte i gjallë

Një ngjarje e rëndë ka ndodhur në fshatin Fermë-Çlirim, ku një 70-vjeçar ka humbur jetën si pasojë e një zjarri të rënë në banesën e tij.

I moshuari, i cili vuante nga paraliza dhe jetonte i vetëm, u kap nga flakët që përfshinë me shpejtësi të gjithë strukturën e shtëpisë.

Sipas verifikimeve të para të policisë, dyshohet se shkak për shpërthimin e zjarrit ka qenë një shkëndijë elektrike.

Zjarri ka djegur çatinë e banesës, e cila më pas është shembur mbi të moshuarin, duke i shkaktuar atij vdekjen e menjëhershme.

Policia e Fierit tha se ngjarja ndodhi sonte rreth orës 19:00, në fshatin Fermë Çlirim, në banesën e shtetasit F. B., rreth 70 vjeç, i cili jetonte vetëm dhe në rrethana të papritura ka rënë zjarr.

Si pasojë e zjarrit, shtetasi F. B., në pamundësi për të lëvizur (i paralizuar), ka humbur jetën.

Grupi hetimor ndodhet në vendngjarje dhe, nën drejtimin e Prokurorisë, po kryen veprimet hetimore për dokumentimin e plotë të ngjarjes, si dhe për përcaktimin e shkakut të rënies së zjarrit.