Kryeministri Edi Rama i është përgjigjur ashpër akuzave të opozitës lidhur me pretendimet se ka marrë si dhuratë një orë me vlerë të lartë nga eksponentë të krimit të organizuar.

Nga aeroporti i Rinasit, kreu i qeverisë i cilësoi kundërshtarët e tij politikë si “pisanjosë me kostum parlamentar”.

Rama deklaroi se të gjitha dhuratat që ka marrë gjatë ushtrimit të detyrës zyrtare janë regjistruar dhe mbeten pronë e shtetit shqiptar.

“Sot në Kryeministri ka një muze të dhuratave. Atyre pisanjosëve me kostum parlamentar u them se në atë muze ka një duzinë orësh të shtrenjta dhe super të shtrenjta,” tha Rama.

Kreu i ekzekutivit sqaroi se orët i janë dhuruar nga vizitorë të huaj apo miq të fuqishëm, por asnjë prej tyre nuk është dërguar në shtëpinë e tij private.

Ai e krahasoi këtë praktikë me atë të paraardhësit të tij në detyrë, duke theksuar se çdo gjë që i jepet Kryeministrit i përket institucionit dhe publikut.

Gjithashtu, Rama hodhi poshtë pretendimet për favore të fshehta, duke nënvizuar se pushteti i tij nuk është përdorur kurrë për të dhënë përfitime të errëta.