TIRANË — Strukturat e Policisë së Shtetit, në kuadër të operacionit ndërkombëtar të koduar “The Wanted” dhe në koordinim me Interpol Tiranën, kanë ndaluar dy shtetas të shpallur në kërkim ndërkombëtar për llogari të drejtësisë italiane dhe asaj kosovare.

Në kryeqytet u vu në pranga 47-vjeçari E. D., lindur në Kavajë, ndaj të cilit Gjykata e Bolonjës kishte lëshuar urdhërarrest në maj të këtij viti. Ai akuzohet nga autoritetet fqinje për pjesëmarrje në grup të strukturuar kriminal me fokus trafikimin, importimin dhe magazinimin e sasive të mëdha të kokainës, marijuanës dhe hashashit në territorin italian përgjatë vitit 2020.

Ndërkohë, në Pikat e Kalimit Kufitar në Rinas u ndalua 38-vjeçari nga Kosova me iniciale H. K. Shtetasi kosovar kërkohej pasi Gjykata e Apelit e Pejës e kishte dënuar në vitin 2022 me 1 vit e 6 muaj burgim për veprën penale të falsifikimit të monedhave. Sipas drejtësisë atje, ai kishte tentuar të hidhte në tregun e Pejës rreth 15 mijë dollarë të falsifikuar gjatë vitit 2021.

Interpol Tiranë po vijon shkëmbimin e informacionit me homologët në Romë dhe Prishtinë me synim përfundimin e procedurave ligjore për ekstradimin e të dy të ndaluarve.