RINAS — Forca të shumta të Gardës së Republikës, Policisë së Shtetit si dhe efektivë të Forcave të Ndërhyrjes së Shpejtë (FNSH) kanë blinduar ambientet e Aeroportit Ndërkombëtar “Nënë Tereza” në Rinas, ku pritet të mbërrijë rreth orës 13:00 kryeministri Edi Rama.

Kreu i qeverisë rikthehet nga Nju Jorku pas pjesëmarrjes në punimet e Asamblesë së Përgjithshme të OKB-së dhe menjeherë pas zbarkimit do të mbajë një deklaratë direkte për mediat nga salla e shtypit në aeroport.

Ndonëse agjenda zyrtare nuk ka zbuluar detaje mbi përmbajtjen e fjalës së tij, burime pranë delegacionit qeveritar bëjnë me dije se Rama do të mbajë një qëndrim zyrtar lidhur me situatën aktuale politike dhe zhvillimet e fundit institucionale.

Komunikimi publik i kryeministrit vjen në një moment mjaft delikat, pas lëvizjeve të fundit të Prokurorisë së Posaçme (SPAK) ndaj ish-drejtoreshës së SHISH, Vlora Hyseni, ngjarje kjo që ka nxitur diskutime të shumta në opinionin publik.