TIRANË — Tradhtia mbetet një nga goditjet më të rënda për një lidhje bashkëshortore, ku sipas psikologëve dhe terapistëve të familjes, shërimi i emocioneve dhe rindërtimi i besimit kërkon nga një deri në dy vjet kohë. Përkundër besimit të hershëm se “kriza e vitit të shtatë” përbënte rrezikun më të madh për çiftet, të dhënat e reja nxjerrin në dritë një realitet tjetër.

Sipas një hulumtimi të kryer mbi ecurinë e marrëdhënieve, rreziku më i lartë për pabesi shfaqet shumë më herët, pikërisht gjatë vitit të tretë të martesës. Raporti tregon se deri në një e treta e personave që kanë tradhtuar e kanë nisur aferën jashtëmartesore pas tri viteve bashkëjetesë, ndërkohë që vetëm 10% e rasteve janë regjistruar gjatë vitit të shtatë.

Nga anketimi i zhvilluar me rreth 2 000 persona të martuar, 7% e të pyeturve pranuan se kanë tradhtuar brenda vitit të parë të martesës, ndërsa 5% gjatë vitit të dytë. Pas katër apo pesë vitesh martesë, kjo përqindje ngrihet në 12%, për të pësuar një ulje të lehtë në 11% gjatë vitit të gjashtë.

Lidhur me faktorët nxitës, pothuajse gjysma e pjesëmarrësve identifikuan rënien e intimitetit dhe largësinë emocionale si arsyen kryesore të pabesisë. Për një të katërtën e çifteve, lindja e fëmijëve dhe presionet e reja familjare ndryshuan rrënjësisht dinamikën e marrëdhënies, ndërsa 16% e të anketuarve e lidhën tradhtinë me konsumimin e lidhjes dhe kërkimin e emocioneve të reja.