TIRANË — Kryeqyteti do të përballet ditën e sotme me kufizime të përkohshme të qarkullimit rrugor për shkak të zhvillimit të aktivitetit sportiv “Tiranathlon”, i cili përfshin disiplinat e notit, çiklizmit dhe vrapimit pranë zones së Liqenit të Farkës.

Sipas planit të masave të publikuar nga pushteti vendor, kufizimet e mjeteve do të jenë në fuqi nga ora 08:00 deri në orën 13:00, duke prekur disa nga akset kryesore nga zona e Farkës dhe rrethrrotullimi i TEG-ut deri në Shkozë.

Segmentet rrugore ku do të bllokohet lëvizja përfshijnë:

Rrugën “Dajti”, nga kryqëzimi me rrugën “Xhelal Molla” deri te kryqëzimi me rrugën e “Vrapëve”, përfshirë edhe rrugën “Dëshmorët e Helikopterëve”.

Bulevardin “Zhan D’Ark” dhe Bulevardin “Bajram Curri”, nga ura e Shkozës deri te kryqëzimi me rrugën “Selman Riza” dhe “Kastriot Feska”.

Rrugën interurbane kryesore në segmentin TEG–Ura e Shkozës.

Unazën e Madhe të qytetit, nga nyja e “Rrethrrotullimit të Freskut” deri te TEG-u, ku devijimi i automjeteve do të bëhet në drejtim të rrugës “Xhanfize Keko”.

Restriksionet do të sjellin edhe ndryshime në transportin publik: linja e autobusit “Materniteti i Ri – Qendër – Ish-Fusha e Aviacionit” do të devijohet përkohësisht te Ura e Brrylit, ndërsa linja “Rrethrrotullimi Shkozë – Ish-Fusha e Aviacionit” do të pezullohet tërësisht gjatë fashës orare të aktivitetit. Qarkullimi i mjeteve të emergjencës dhe Policisë së Shtetit do të vijojë pa pengesa.