TIRANË — Gjatë periudhës 2017-2025, buxheti i shtetit ka disbursuar gjithsej 98 miliardë lekë, ose rreth 1 miliard euro, për financimin e 12 kontratave koncesionare të formës Partneritet Publik-Privat (PPP). Pothuajse gjysma e kësaj shume u është alokuar projekteve që aktualisht ndodhen nën hetim zyrtar nga Struktura e Posaçme Kundër Korrupsionit dhe Krimit të Organizuar (SPAK).

Sipas të dhënave financiare zyrtare, për gjashtë nga 12 kontratat e financuara nga paratë publike — duke përfshirë tre inceneratorët dhe tre koncesione në sektorin e shëndetësisë (sterilizimi, kontrolli mjekësor bazë "check-up" dhe rrjeti i laboratorëve) — janë ngritur akuza për korrupsion, shpërdorim detyre dhe pastrim parash.

Për këto gjashtë kontrata problematike, shteti ka paguar rreth 440 milionë euro (44.4 miliardë lekë), çka përbën 44% të gjithë fondeve të alokuara për koncesionet përgjatë tetë viteve të fundit. Projektet e inceneratorëve absorbuan rreth 15 miliardë lekë, ndërsa koncesionet shëndetësore nën hetim përfituan rreth 29.6 miliardë lekë.

Pagesa më e lartë individuale nga buxheti i shtetit i është kaluar projektit të Rrugës së Arbrit me 22.6 miliardë lekë, e ndjekur nga koncesioni i sterilizimit me 14.8 miliardë lekë, ai i skanimit me 13.7 miliardë lekë dhe inceneratori i Tiranës me 8.4 miliardë lekë.

Pavarësisht kosto me peshë në buxhet, disa nga kontratat kryesore kanë dështuar të përmbushin objektivat financiare e teknike. Inceneratori i Elbasanit ka funksionuar vetëm për një periudhë të shkurtër, ai i Fierit nuk është vënë kurrë në punë pas ndërtimit, ndërsa në Tiranë impianti i djegies së mbetjeve nuk ka nisur ende nga ndërtimi, ndonëse pagesat nga buxheti kanë vijuar rregullisht.

Me përfundimin e afateve kontraktuale, veçanërisht në sektorin e shëndetësisë ku disa kontrata mbyllen këtë vit, shteti ka nisur rimarrjen e drejtpërdrejtë të këtyre shërbimeve. Në fillim të vitit u krijua shoqëria aksionare shtetërore për menaxhimin e sterilizimit spitalor, duke kaluar kështu administrimin nga sektori privat te korporatat publike.